RAFEL VIDALLER TRICAS, GANADOR D’O «V PREMIO PEDRO LAFUENTE EN ARAGONÉS»

O escritor s’ha alzato con o gualardón en categoría “Narrazió Curta” por a suya obra “Arbolera”.

O escritor Rafel Vidaller Tricas ha resultato ganador d’a V edizión d’o “Premio Pedro Lafuente en aragonés”, en a categoría de “Narrazió Curta”, conzedito por o Conzello de Uesca.

Rafel Vidaller, naxito en o munizipio uescano de Salas Altas, ye diplomato en Machisterio, lizenziato en Antropolochía Sozial y Cultural y autor de numbrosos estudios sobre a naturaleza altoaragonesa, asinas como de diversas narrazions curtas que ya estioron dinas de reconoixenzia. No por demás, a suya obra “Tratato sobre a Mary Roya”, obtenió a millor valorazión d’o churau en a II edizión d’iste mesmo premio, en 2017.

“Arbolera” ye o titol d’a obra que ha resultato ganadora en a presén edizión. D’ella, o churau, compuesto por Chabier Lozano, Chusé Inazio Nabarro, Eduardo Laga Lázaro, Gabriel Sanz y Lucas Fernández Mateo, ha acobaltato a calidat d’o parlache, a orichinalidat d’a trama y l’ameno d’a narrazión, que fica a o leutor en una istoria que se desembolica en a ziudat de Uesca y o suyo entorno, como si d’un presonache más se tratase.

O premio, que será entregato en as prosimas semanas, prene o nombre de Pedro Lafuente Pardina, escritor costumbrista naxito en Uesca en 1929 que estió siñalero  por a esfensa y estudio d’as tradizions, d’a istoria y d’a luenga d’Aragón.

RAFEL VIDALLER TRICAS

 


CompartirEmail this to someonePrint this pageShare on FacebookShare on Google+Tweet about this on TwitterShare on LinkedIn