PENDE DE ROS 2
O CEIP San Juan de la Peña, de Chaca, presenta o vidioclip en aragonés «Pende de ros 2». O proyeuto, enfilato por a profesora d’aragonés Miriam Aranda, fa partizipe a ra comunidat educativa d’o zentro e cuenta con o refirme d’a Direzión Cheneral de Politica Lingüistica a traviés d’o Programa Luzía Dueso, e o Conzello de Chaca.
Podez veyer o vidioclip astí
Parabiens ta la alumnalla e profesorau partizipán e, más que más, a Miriam por o suyo sobrebueno treballo e que quiere despedir o curso con istas ringleras que posamos astí baxo:
«Remato iste curso calificando-lo como un d’os más emozionalmén intensos d’a mía carrera. Luitando y peliando un proyeuto tan poliu y, pro que, duro, como ye estau iste «Depende de los 2» en Luenga Aragonesa.
Me cuacaría encomenzar istas linias dando as grazias a o proyeuto orichinal d’iste vidio naxiu dende o PRAPI, pues sin d’els ista versión no esistiría pas. Milentas de grazias. Por pensar una canta que esfendese y protechese as valors d’igualdat y coeducazión que tanto abanderamos. Nomás veyendo que as zifras de YouTube tos podez fer una ideya de dica do ez plegau!
Me cuacaría tamién, agradeixer a tota la comunidat que s’ha implicau en iste proyeuto. Soz estau muitos os que nos aportez o vuestro grano d’arena en iste arduo prozeso. Como he dito, ye estau un proyeuto con muito treballo duro dezaga que m’ha feito comprender encara más que por desgrazia, muitos de nusatros nos empeñoramos en chuntar a luenga y a cultura a la politica, en coloriar o patrimonio d’una tierra y en silenziar tantísmas vozes de personas que nomás quieren que estar respetadas y vivir libremén a suya luenga y a suya identidat cultural.
Por unatro costau, quiero agradeixer tamién a tota la comunidat que s’ha uniu ta quitar iste proyeuto adebán y ha luitau con yo ta empentar-lo. Os míos compañers d’o proyeuto: Chus, Elena, Bego, Pilar, Blanca, Sonia, Vanesa, Sandra, Javi, Yolanda y Lucas, que son estaus colaborando y refirmando en tot momento. A o conzello de Chaca, por confiar dende un prenzipio en ista ideya y querer brindar-nos una oportunidat apostando por ista, a nuestra _Luenga Aragonesa_ , y por estar un d’os mayors motors de fomento ta la cultura Chaquense y aragonesa. Y dar as grazias tamién a la Direzión Cheneral de Politica Lingüistica por aduyar en ista luenga travesía refirmando y aduyando perén a espardir as nuestras luengas.
No menos importans en iste treballo, son estadas as chicotas entidaz que ez formau parti vital en ista ilusión. En produzir o vidio y calar tantas oras, Alfonso, David, más totas aquellas personas que ez quiesto u ez pediu colaborar asesorando u partizipando-ne de mil trazas; a Ziudadela de Chaca zedendo o suyo espazio, zentros educativos que tos ez ofrexiu, grupos mosicals disposaus a colaborar, etc.
Dinantes,cada vez que escuitaba que «l’Aragonés ye muerto» u que «dengún no fabla Aragonés» me dentraban ganas de quitar a luzera y a forca y enrestir. Ara nomás me’n rido y penso cuan atrevida ye a inoranzia y cuanto esconoximiento bi’n ha.
Cuan diversos seutors dizen que as luengas distanzian a la chen u «deseparan a os españols»
penso en iste vidio y en como una luenga ha feito que una comunidat se chunte y treballe unida por iste proyeuto. No tiengo guaires parolas ta isto. Eternamén, grazias a toz os implicaus, prou que nunca no reblar, entabán y entalto Aragón.
