ECHO FA UN GRAN OMENACHE A «S’HA FEITO DE NUEI»
Con la inaugurazión de una placa con la letra de la canta y un conzierto de cuantos grupos mosicals
9/10/2021. Más de 700 personas han asistiu uei en la Plaza de la Fuen de Echo a un gran omenache a una canta que ha traspasau las buegas de la val y ya ye conoxida y almirada por toz los aragoneses. Ye estau organizau por lo conzello de la Val, con la colaborazión de la Direzión Cheneral de Politica Lingüistica de lo Gubierno d’Aragón y la Comarca de la Chazetania.
La interpretazión de «S’ha feito de nuei» por tres corals, entre ellas l’orfeón jacetano y la coral de la Val ha marcau l’inizio de l’omenache, lugo grupos como Grupo Folklórico Alto Aragón, el Grupo Folclórico Santiago, el Grupo de Jota Uruel, Miércoles de Cecina, La Orquestina del Fabirol, La Ronda de Boltaña y Os Chotos con Marta Casas han feito un tributo a lo Grupo Folclorico Val d’Echo que, baxo la direzión de Pepe Lera (autor de la canta) ha interpretau tres cantas, metendo a lo publico en pie con la interpretazión de toda la plaza de «S’ha feito de nuei» y rematando con la jota chesa bailada por la chen choven de lo lugar.
Lo Director Cheneral de Politica Lingüistica de lo Gubierno d’Aragón ha dau prenzipio a l’auto, rematando la suya intervezión liendo iste poema de lo poeta cheso Emilio Gastón y deseyando larga vida a S’ha feito de nuei y lo Grupo Folclorico de la Val d’Echo:
“Bienalmiraus paisanos y paisaxes:
Vos demando disculpas
por los míos errors gramaticals…
Y por los desatinos de gazapos mostrencos.
Vusotros que guardaz la fabla chesa con mimo y atenzions.
Vusotros que cudiaz los panoramas maravillosos de La Subordania.
Vusotros que fablaz y que cantaz con tanta correzión y tanto goyo…
Vusotros los leutors y escribidors…
… vos merezez aireras d’esplicazions en lo mío descargo:
¿Por qué me i-so metiu a escribir cheso
con inoranzia tan descomunal?
Lo vos confieso sin tapullos con una sola frase:
“los descaráus, tamién emos vergüeña”.
Grazias a dios, tamién emos remeyo… con lo tiempo.
Vos confieso lo mío atrivimiento, la falta de pudor, la mía prisa…
Lo vos azeuto d’antemano…
Pero con esperanza de que me comprendaz.
No m’he podiu contener:
M’he croxidáu…: ¿Qué vas a fer Emilio?
Si no has n’idea de la ortografía
ni de l’azentuazión,
ni de las solfas…
¿qué mistura de cheso nos quieres escribir?
He demandau aduya de Rosario, de Lera,
de las publicazións vario-pintadas
… pero como si no.
De lo mio tozuelo no sale idea clara … de cómo escribir correutamén.
So un corazonal … lo siento muito.
Y azeuto lo que i-so… pa croxidar-me.
[…]
Se nos vedé crear en cheso,
Se malmiré fablar en cheso
y s’enterré escribir en Fabla.
Pero los chesos no morieron… y siguieron fablando…
Y siguieron dizindo en fabla chesa
Todo lo qu’eban de dizir.
L’auto se fazié integramén en aragonés y estie machistralmén conduziu por Javier Marín.
Azeda astí a o vidio d´o evento.
