DEVANTADERA D’O ZENTRO D’INTERPRETAZIÓN DE L’ARAGONÉS «ANA ABARCA DE BOLEA»
O prosimo viernes, 1 de chulio, a las 11 oras, será inaugurato ro Zentro d’interpretazión de l’aragonés «Ana Abarca de Bolea», ubicato en o monesterio de Santa María de Casbas (Uesca).
O zentro, que auespa una esposizión permanén que pretende dar a conoxer a luenga aragonesa, prene o nombre d’Ana Abarca de Bolea, a primera muller que se conoxe que escribió en aragonés, que estió abadesa d’o Monesterio d’a nuestra Siñora d’a Gloria de Casbas y se relazionó literariamén con Baltasar Gracián y con Vicencio Juan de Lastanosa, entre atros mezenas y escritors.
Un itinerario a lo largo de cuatre salas propone a lo visitán un recorriu por a istoria de l’aragonés, a traviés d’o cual podremos azercar-nos con detalle a cuestions como a investigazión lexicografica desarrollada dende o primer vocabulario conoxito en o sieglo XVI, a suya presenzia en os meyos de comunicazión, mosica, literatura u artes eszenicas, asinas como en l’entorno sozial y economico d’o nuestro territorio.
Tot ixo se completa con una selezión de documentos que viachean dende o sieglo XIII dica prenzipios d’o sieglo XX y a inclusión d’as nuevas teunolochías ta ofrexer l’azeso a mosica, zintas y recursos multimedia en luenga aragonesa.
Iste zentro d’interpretazión, en o cual se podrán levar a cabo tot tipo d’autividaz culturals, asinas como de promozión, difusión y investigazión, relazionadas con l’aragonés, aspira asinas a promover un aprendizache creyativo y contribuyir a l’aprendizache y difusión de l’aragonés.
En l’auto serán presens José Ignacio López Susín, direutor cheneral de Politica Lingüistica d’o Gubierno d’Aragón; Iris Orosia Campos Bandrés, direutora zientifica d’u Zentro d’interpretazión de l’aragonés Ana Abarca de Boleya, María Pilar Viu Bescós, alcaldesa de Casbas y un representán d’a Comarca Plana de Uesca y de l’Asoziazión Monasterio de Casbas.
