DEVANTADERA DE “BOLISNAS” Y PRESENTAZIÓN D’O LIBRO “AS DREZAS DE ZARPILINIANTE”, D’ELENA GUSANO GALINDO

A Biblioteca d’Aragón (Carrera Doctor Cerrada 22, Zaragoza), acullirá o prosimo chueves, 10 de noviembre, a las 19:00 oras, a devantadera d’a esposizión de pintura “Bolisnas” y a presentazión de la obra “As drezas de Zarpiliniante”, d’Elena Gusano Galindo.

O cuento «As drezas de Zarpiliniante» trata d’as andanzas de Zarpiliniante, un duende chicorrón y menuto que vive en as casas ansotanas interferindo en as fayenas d’o fogar y trestucando o buen fer d’as dueñas d’a casa con as suyas estuzias.

Ye alparzero, metomentodo, borzagué y a vezes un poquet borinot. Emparentau con menutos y gorrorrois d’atras vals d’o Pireneu que cumplen, como él, o papel de rezibir as culpas d’as pizias que ocurren en a casa.

En a val d’Ansó, chunto a Zarpiliniante, i hai atros seres machicos, como Maiveral, asoziada a l’augua que traye vida, u Marraquera que leva con uno mesmo os periglos de tronadas y barrancos, y a toz, d’una u unatra traza, cal tener-los contentos ta que os días descurran sin contumanzia.

Bolisnas, por a suya parte, replega 11 cuadros en os se presienta una personal versión de cuadros clasicos, de fotografías antigas d’estrelas de zine y d’ansotanas armadas con o suyo trache tradizional.

Totas dos autividaz se relazionan con a esposizión “Vozes en o zierzo/Veus en o cerç/Vozes en el cierzo. Escritoras en aragonés y catalán d’Aragón. Escriptores en aragonés i català d’Aragó. Escritoras en aragonés y catalán de Aragón”, que puede desfrutar-se en o Paraninfo d’a Universidat de Zaragoza dica o mes d’aviento, antes de viachear a Chaca y Alcañiz.

En l’auto serán presens, José Ignacio López Susín, direutor cheneral de Politica Lingüistica d’o Gubierno d’Aragón; Julia Ara Oliván, comisario d’a esposizión en aragonés; Maite Moret Oliver, comisario d’a esposizión en catalán d’Aragón; y l’autora, Elena Gusano Galindo.

VESITA A WEB D’A ESPOSIZIÓN

INVITAZIÓN DE L’AUTO


CompartirEmail this to someonePrint this pageShare on FacebookShare on Google+Tweet about this on TwitterShare on LinkedIn