· A PRIMERA FERIA AGORA X L’ARAGONÉS YE PLEGADA EN ZARAGOZA TA QUEDAR-SE-IE.
Más de 60 partizipans prozedens de toz os rincons d’Aragón se troboron en o zentro de convivenzia ta mayors Pedro Laín Entralgo que deixoron claro que sienten y aman a luenga aragonesa.
Una iniziativa promovida por o Departamento d’Educazión, Cultura y Esporte d’o Gubierno d’Aragón, con a colaborazión de Turismo de Aragón, Instituto Aragonés de Fomento y Conzello de Zaragoza, endrezada a personas, asoziazions, comerzios, interpresas, profesionals e instituzions con l’obchetivo de dar a conoixer, tanto a ninos como a mayors, l’aragonés, una luenga con denominazión d’orichen, asinas como practicar-la y espardir o suyo emplego.
Ta amillorar a suya partizipazión en «Agora», os espositors asistioron a una sesión informativa sobre Responsabilidat Sozial con a luenga aragonesa.
A chornada s’inauguró con a vesita d’o Director Cheneral de Politica Lingüística, José Ignacio López Susín, a os 35 stands que ofreixioron os suyos productos y servizios más aragoneses.
Amás, contó con a presenzia d’os Bombers de Zaragoza, que amostroron a suya profesión a os más chicoz e interpretoron cualques melodías con a Colla de Gaitas.
Se i presentoron y se i dioron a conoixer diferens proyectos que se son desembolicando por tot lo territorio.
Os asistens disfrutoron de cuantas actuazions mosicals con instrumentos tradizionals d’a tierra y, profes, con cantas en aragonés. Igualmén, se i podioron veyer chuegos tradizionals y recreyazions istoricas, amás de fer una ampla degustazión de cafés, bieras y muitos atros productos aragoneses mientres os más chicoz aprendeban a cultura aragonesa con cuentacuentos, machia, proyezions y más que divertius tallers…
Y tot ixo ta que, entre toz, charremos a nuestra luenga…
Compartir
