SEMINARIO TA PROFESORS/AS DE LUENGA ARAGONESA
O diya 13 de mayo se fizió a zaguera sesión online d’o Seminario ta profesors/as de Luenga aragonesa, que s’adedicó a compartir esperienzias e recursos entre os diferens miembros d’o Seminario e por parti de otros ponens.
Entre os miembros d’o seminario, Gerardo Pesqué Gascón compartió una esperienzia d’aula feita en o CRA Estadilla Fonz, en o que ye mayestro d’aragonés, a partir d’a canta en aragonés «Unicos» de Alejandro Ibázar. Tamién David Pardillos Martín, profesor en o IES Valle de Jiloca, asplicó que, anque no s’imparte l’asignatura de Luenga aragonesa en o zentro, dende fa tres años desembolica l’autividat «Palabras del mes» («Parolas d’o mes», en aragonés), en a que se trigan parolas en seis luengas, que se difunden en papel e en a web d’o zentro. María Villalba Monente, mayestra d’aragonés en o CEIP Sancho Ramírez e en o CEIP Santos Samper, charró de diferens ferramientas teunolochicas que se pueden emplegar en l’amostranza de l’aragonés (Educaplay, Canva, Kahoot, Padlet, GoConqr, Genially, Lifeworksheets, Plickers…) con exemplos prauticos feitos en l’aula.
En o que fa a os ponens, Guillermo Gómez Mur, d’o CP Ana Abarca de Bolea, amostró o Blog de experiencias de aula e a traza de publicar en él. D’otro costau, Juan Antonio Pérez Bello, d’a Direzión Cheneral D’Innovazión e Formazión Profesional, fizió o mesmo con a pachina web Innovación educativa Aragón e asplicó as posibilidaz que tiene. Asina mesmo, María Pilar Benítez Marco, d’a Direzión Cheneral de Politica Lingüística, comentó os recursos e materials educativos que se pueden trobar en a pachina web Lenguas de Aragón.
D’ista traza, se zarra en iste curso o Seminario ta profesors/as de Luenga aragonesa, que s’ha carauterizau por fer-se online, por l’alta partizipazión de dozens que imparten aragonés u que en un futuro lis fería goyo fer-lo e por a variedat d’asuntos abordaus.
