ESPIELLO, FESTIVAL INTERNAZIONAL DE DOCUMENTAL ETNOGRÁFICO DE SOBRARBE DARÁ A CONOXER OS PREMIOS “AGORA X L’ARAGONÉS”
O prosimo sabado, 11 de marzo, o Palazio de Congresos de Boltaña acullirá a gala de libramiento d’os VI premios Espiello Agora x l’aragonés.
Agora x l’aragonés ye un premio que naxe con l’obchetivo de difundir o patrimonio lingüistico aragonés, asinas como fomentar a creyazión audiovisual en luenga aragonesa y dar visibilidat y difusión a os treballos realizaus.
Ta la categoría cheneral, dotada con 900 euros y trofeu, o churau, compuesto por Quino Villa, Vicky Calavia y Francho Marcén, avaluará os 4 treballos que optan a o gualardón:
. Casa mía, casa tuya de Silvia Orós.
. Adormi-te de Carlos Baselga.
. Y Eva tamién de Laura Torrijos-Bescós.
. A replegadora de parolas de Carlos Baselga y Fran Martín.
En a categoría escolar, dotada con una autividat ludico-educativa avaluada en 500 euros y trofeu, s’han presentau 5 treballos:
. Es millors mistantes de Belsetans TV 2022; Mete-te al diya con as notizias de Chistén; y Notiziero de Plan TV, a cargo d’alumnos d’aragonés d’a profesora Yolanda Mur (CRA Cinca-Cinqueta).
. Nuei d’almetas, de Jesús Botaya y Luis Machuca (colechio Salesiano de Uesca).
. Las aventuras d’Antón, de Lucía Fernández (IES Castejón de Sos).
Amás, en a presén edizión, se podrá desfrutar, entre os diyas 11 y 19 de marzo, d’a esposizión “O nuestro charrar/ O nostre parlar”, proyeuto empentau por a Direzión Cheneral de Politica Lingüistica d’o Gubierno d’Aragón y a Soziedat Cultural Aladrada, que recupera frases feitas y esprisions en aragonés y catalán d’Aragón con testos d’Iris Orosia Campos y debuxos de Delia Tello. A Chaminera s’encargará d’a mesa en eszena.
L’auto, que será enfilau por Jorge Pueyo y amenau por o grupo Ixeya, contará con a presenzia d’o direutor cheneral de Politica Lingüistica, José Ignacio López Susín.
