CHULIA ARA OLIVÁN Y FRANCHO NAGORE LAÍN, VI PREMIO PEDRO LAFUENTE EN ARAGONÉS
Chulia Ara Oliván ye estada gualardonada con o VI Premio Pedro Lafuente en aragonés en a categoría de Narrazión Curta grazias a la suya obra Bilaniéns.
O Churau, integrato por Chusé Inazio Nabarro, Francho Beltrán Audera, Francho Marcén Cobos, Chesús Vázquez Obrador y Rafel Vidaller Tricas, ha acobaltato a capazidat de l’autora por “amostrar o camín d’a migrazión de prenzipios de sieglo a traviés d’una prosa zercana y una estrutura narrativa tradizional”.
En a categoría de Poesía, a reconoxenzia ha recaito en Francho Nagore Laín grazias a Cómo fer un paisache, pieza en a cuala amuestra o dominio de l’aragonés a traviés d’una composizión plena de ritmo que transita entre o naif y o minimalista, mientres que Óscar Latas Alegre ha rezibito a menzión espezial d’o churau por a suya visión de Uesca reflexada en D’aquella mezquita pintata.
O premio en a categoría d’interpresa reconoxió a Natural Optics Guara, d’a ziudat de Uesca, por o suyo refirme a la difusión d’a luenga aragonesa a lo largo de más de dos dezenios.
Iste gualardón, conzedito por o Conzello de Uesca, prene o nombre de Pedro Lafuente Pardina, escritor costumbrista naxiu en Uesca en 1929 y que zentró o suyo treballo en a esfensa y o estudio d’as tradizions, d’a istoria y d’a luenga aragonesa.
