CARMEN CASTÁN SAURA RECULLIRÁ EN BENÁS O PREMIO CHUANA COSCUJUELA 2020
O viernes, 30 de setiembre, a las 18:30 oras, o Palazio d’os Condes de Ribagorza de Benasque acullirá a zeremonia de libramiento d’o Premio Chuana Coscujuela 2020 a Carmen Castán Saura.
O premio ye destinau a la reconoixenzia a un treballo contino u d’espezial notoriedat y importanzia, en cualsequiera d’as arias sozials, culturals, esportivas, artisticas, economicas, etc., que supongan un destacau benefizio ta l’aragonés, tenendo espezial considerazión as actividaz destinadas a la dignificazión, difusión, investigazión, amostranza, esprisión literaria, etc., y que siga un modelo y testimonio exemplar ta la soziedat aragonesa.
O churau dezidió atorgar o gualardón d’a edizión de 2020 a Carmen Castán Saura, pionera en l’amostranza de l’aragonés benasqués y dinamizadora cultural d’a val, amás d’estar l’autora de una ripa de novelas y publicazions de divulgazión etnografica.
L’auto, que se completará con a presentazión d’o libro “A vall de Benás misteriosa y máchica”, s’engloba dentro d’o conchunto d’actividaz programadas dende a Direzión Cheneral de Politica Lingüistica d’o Gubierno d’Aragón dentro d’a zelebrazión d’o Día Europeu d’as Luengas, instituyiu por o Consello d’Europa o 26 de setiembre.
