O pasau sabado, 19 de noviembre, l’Auditorio de Zaragoza fabló aragonés entre a zelebrazión d’a III edizión d’a Feria Agora x l’aragonés.

A las 10:45 oras, Felipe Faci Lázaro, consellero d’Educazión, Cultura y Esporte, y José Ignacio López Susín, direutor cheneral de Politica Lingüistica d’o Gubierno d’Aragón, inauguroron una feria que mantenió as suyas puertas ubiertas dica las 21:00 oras ta toz aquels que, sin importar edat y de baldes, querioron amanar-se a la luenga aragonesa.

No mancoron as presentazions de libros, os tallers, charradas informals, proyezions audiovisuals y a posibilidat de recorrer os puestos d’as 44 entidaz que nos amostroron productos vinculaus a l’aragonés y iniziativas que s’enchegan ta protecher o patrimonio cultural.Tot ixo se completó con as autuazions de Teyatro Salesianos Uesca, Titiriteros de Binéfar, Corro d’es Bailes de San Chuan, Mosicaires, A Chaminera y d’a Orquestina d’o Fabirol.

A Feria tornó a estar refirmada por o publico, refincando-se asinas como punto de trobada ta toz aquels que d’una u unatra manera se relazionan con a luenga aragonesa, contribuyindo a normalizar o suyo uso, bella cosa fundamental ta o suyo reviscole en o presén y a suya pervivenzia en o esdevenidero.
Se trata d’una iniziativa promovida por a Direzión Cheneral de Politica Lingüistica d’o Gubierno d’Aragón, que conta con a colaborazión d’o Conzello de Zaragoza y a promozión d’o Ministerio de Cultura y Esporte d’o Gubierno d’España, en a cuala partizipan asoziazions, interpresas, comerzians, profesionals, particulars y instituzions aderius a o programa “Agora x l’aragones”.

MÁS FOTOS D’A FERIA, AQUÍ

Compartir