BOLTAÑA ACULLIÓ A ENTREGA D’O PREMIO ESPIELLO AGORA X L’ARAGONÉS
O pasau domingo se fazio a gala de clausura y a entrega d’o premio Espiello Agora x l’Aragonés dentro d’o Festival Internazional de Documental Etnográfico de Sobrarbe, organizau por o Servizio de Cultura d’a Comarca de Sobrarbe.
O churau, composau por Francho Marcén Cobos, Yolanda Mur Terrel y Quino Villa Bruned, y en o cual actuó como secretaria Patricia Español Espurz, directora d’Espiello, dezidió adchudicar ex-aequo o premio ESPIELLO AGORA X L’ARAGONÉS CHENERAL a o millor audiovisual gravau, doblau u soztitolau en aragonés en l’año 2021, dotau con 900 euros y trofeu, a Ai Dios! De Carlos Baselga Abril y Francisca Martín Mauri, y Baztàn_Bidasoa selvas umidas de Navarra d’Iñaki Atxa Aranburu.
O premio ESPIELLO AGORA X L’ARAGONÉS ESCOLAR a o millor audiovisual gravau, doblau u soztitolau en aragonés en l’año 2021, dotau con una esperenzia lúdicoeducativa avaluada en 500 euros y trofeu, recayió en Así, no i arribarán mai d’o IES Castejón de Sos d’a profesora Luzía Fernández Ferreres.
Amás, s’atorgó un azesit a lo curtometrache A viella lladre y se reconoxió a continada labor de realizazión audiovisual en l’entorno escolar a o profesor Javier Vispe Mur.
Toz els rezibioron o gualardón de manos de José Ignacio López Susín, director cheneral de Politica Lingüistica d’o Gubierno d’Aragón, como reconoixenzia a la suya labor de difusión d’o patrimonio lingüistico aragonés y d’o desembolique d’a creyazión audiovisual en luenga aragonesa.
AZEDA DENDE AQUÍ A O VIDEO D’A GALA
