· RASMIA, A VERDADERA ISTORIA D’ARAGÓN, DE DINGOLONDANGO
A colla de teyatro d’Ansó Dingolondango, enfilada por a escritora Elena Gusano, contina o treballo arredol d’a luenga e a cultura aragonesas, achuntando presonas ansotanas de diferens chenerazions que charran ansotano. Dimpués de calar en eszena Yésica, un abrío d’agora, Percaciando una facería, Isto s’afunde e Purnas alparceras, dende l’año pasau, está representando a obra Rasmia, a verdadera istoria d’Aragón, una divertida comeya que, en clau d’umor, fa un repaso por o pasau d’Aragón, desmitificando-lo.
A obra, escrita en ansotano por Elena Gusano, s’estrenó en Ansó o verano de 2018 e, dende alora, s’ha representau tamién en Pamplona, Chaca e o pasau diya 27 d’abril s’eszenificó en o Centro Joaquín Roncal de Zaragoza, con a colaborazión d’Agora x l’aragonés e o Gubierno d’Aragón. As dos sesions que se fizioron estioron plenas de chen, que disfrutó d’una propuesta teyatral que convida á repensar a istoria d’Aragón e á reflexionar sobre o presén dende l’umor.
