· PRESENTAZIÓN D’O LIBRO «CAMBRAS CERRADAS» DE DIAGO LEZAUN
22 de abril , 19,30 horas
LA PANTERA ROSA, C/ S. Vicente de Paúl 28, Zaragoza
Gara d’edizions
RESEÑA
Toz alzamos aintro buen amiro de cambras zarradas an viven as nuestras zamuecas, traumas, vivenzias no guaire buenas y emozions mal chestionadas, que nunca no vesitamos. Si quiers que a mierda no puda a pior ideya ye rechirar-la con un tochet, pero, muitas vegadas, si quiers avanzar, a millor traza ye conoixer as tuyas fientas. L’autor ha preso a dezisión d’ubrir ixas puertas a truco de ayahuasca y jurema, y ista segunda coleczión de poemas ye parti d’os chicoz tresoros que ha trobau en as suyas cambras, antis emporcadas y ixuvlidadas, an agora i dentra la luz. Un omenache a la mai calavre, o silenzio, l’odio a l’otri y a retrobada con os elementals y os chirmans. Un corazón, que encara palpita y bulle, denzima d’a mesa d’o lector.
BIOBIBLIOGRAFÍA
Diago Lezaun ye un monche d’a cultura aragonesa. Ha adedicada la suya vida a reviscolar a mosica tradicional d’a nuestra tierra y a fabla más chicota d’Europa, que mos fa diferens d’a resta de vezins. Mientres ventizinco años como gaiter, mayestro de gaita y donzaina, y d’aragonés. Ye naixíu de Zaragoza en 1.974. Estudeó en os colechios San Andrés y Romareda d’a capital, y Machisterio en mosica y infantil en a Universidat de Zaragoza. Ye miembro de Fablans y de Nogará dende os primers novanta y un d’os primers tetulaus con o B2 d’aragonés.
A suya producción en aragonés va dende o Metodo de flauta de tres foraus y tambor de cuerda (2.012), d’o que ye coautor, dica a o poemario En os bandiadors (2.018) publicau en ista mesma editorial, pasando por deziseis treballos discográficos con Zicután, Maut, Dulzaineros del Bajo Aragón y La Orquestina del Fabirol, an l’aragonés ye fabla única u, a lo menos de referenzia. Tamién ye estau o primer blogger en aragonés con Si os cucos fablasen.
Enguán compachina mosica y amostranza de l’aragonés a ninos de primaria y infantil en a escuela publica.
